每逢有新盤推出，發展商都會扭盡六壬做宣傳，希望個盤可以賣個滿堂紅。好似香港小輪（050）粉嶺新盤逸峯咁，噚日出動一班𡃁模坐住一架開篷巴士巡遊，去勻港九新界宣傳。咁啱華華喺鰂魚涌撞到一行十幾人嘅𡃁模，佢哋落晒車喺康怡花園附近嘅英皇道一帶向途人派逸峯傳單，都幾矚目，但唔覺眼有龍友。自從政府上個月底再推出新辣招後，樓市即刻被打沉，二手好多大型屋苑冇單開之餘，長實（001）亦帶頭劈價賣新盤。今次始終係香港小輪第一次自己投地起樓發展，加上又撞正樓市淡靜，惟有落力啲做宣傳啦！