上星期有幸認識一位財經版編輯，還是一位美女食評家，可惜那頓飯的味道個人評價並不怎樣，而人氣店亦名過其實。不過整體評分仍是不錯，主要原因還看席上佳客，另外我亦慣常地給了一些「酌情分」，無他，只怪自己「唔識食」。基於向來的嚐味能力不高，從來只有羨慕那些味覺敏銳的人，再者一向急性子，精品細味的「慢食」功夫也不是我能應付。所以往往糟蹋了好東西，又辜負了廚子巧手，差點還冒犯了人家幾百年的名聲。
有豆腐味 有口感
說的自不是上述香港那些所謂名店，而是一家位處京都的豆腐店，據稱是日本最早的湯豆腐料理店，創立於寬永12年（寫咗等於冇寫，即係西曆1635年），經營至今已歷378個寒暑。至於這間幾百年老店的所在地就是京都名剎南禪寺旁，而湯豆腐最初也就是為寺院僧人供食，且是「精進料理（也就是素食）」的重要食材。「精進」二字，原有專心致志，努力不懈的意思，套用於烹飪，也就清楚說明如斯料理本為僧人修行齋戒而設，簡樸飲食亦有助摒除用者慾念。不過今日倒成了凡夫（像我這種遊客）另一朝聖之舉，300多年前，怕且唔會有乜人諗到。
講番這個朝聖餐單，劃一菜式，單一收費，童叟無欺，唯一選擇就係：「食定唔食」。話明係修煉，如此安排，合情合理。反正幾百年都是獨沽一味，犯不着為俗子搞花臣，貴客亦只好心無旁騖、全神貫注去欣賞，尤其係我，亦早已做好思想準備要「隨遇而安」。嗰餐唔計個飯，總共有五樣紛陳，首先前菜有胡麻豆腐、味噌烤豆腐同山藥泥。都不錯，因為每一樣嘢，我就算蒙着眼都知自己食緊乜，其實這點很重要，此很謂「真味」也。
至於主菜「湯豆腐」，店員為求我們能得嚐「真味」，更加主動示範此菜的吃法（其實係佢盡最大努力以英文講解，我哋都係呆望）。首先就是將原本置於鍋中央，裝有淡醬汁的小瓶拿走，然後將鍋裏的豆腐撈至碗裏，酌量加入䓤花及七味粉，再略以已燙熱的醬汁調味即可食用。照搬嗰啲女藝員嘅口脗，就係好有「豆腐味」同「口感」，雖嫌膚淺同求其，卻已經是我最真摰的表達。況且以我這個一貫「重口味」的食客，竟然可以甘之如飴，實不可思議，至於更招人非議之舉，明天續談。
盧先亞