香港馬場有著名練馬師大摩嘅「魔法幻影」，而英超球場上就有「哈利魔法」。雖然我求大俠喺度已講過好多次，昆士柏流浪（QPR）領隊哈利列納點樣施展魔法去救隊波，不過佢實在勁，𠵱家變到連霉兵都識入波；喺上周六嘅聯賽反勝新特蘭，首次喺今屆聯賽連捷，所以點都要講多次「哈利魔法」囉！
QPR喺上年11月底委任哈利列納為領隊，就係睇中佢拯救球隊有一手；雖然目前QPR仍未脫離降班漩渦，但佢哋嘅表現明顯好轉，喺上周六於主場3:1反勝新特蘭後，可以話令護級任務露曙光㖭！因為目前QPR雖然以29戰得23分包艇（見附表），但較尾4嘅阿士東維拉同埋尾5嘅修咸頓，只係分別少4分同5分，護級仲未絕望。
QPR主場反勝黑貓
喺反勝「黑貓」新特蘭場波最可圈可點嘅，係無論久沉嘅霉兵，抑或經驗甚淺嘅小兵，都俾列納變到識得入靚波！我求大俠講緊嘅係上周六同樣射入世界波嘅90後小將安祖斯唐辛，同埋發咗霉好耐嘅前英格蘭國腳中場贊拿斯呀！QPR雖然先落後0:1，但佢哋喺30分鐘由法國前鋒雷米追平，之後喺70分鐘，21歲嘅熱刺借將中場安祖斯唐辛喺離門25碼射入靚波，QPR反勝2:1；臨完場前，後備入替嘅贊拿斯同樣遠射入網，QPR終以3:1贏波，今屆聯賽首次連捷兼取得第2場主場勝仗。值得一提嘅係，30歲贊拿斯對上一次喺英超入波，已經係09年9月嘅事！
得戚列納：最緊要贏波
賽後列納喜形於色，但佢仍然好克制咁話：「我哋令自己保持護級希望，我哋正朝住正確方向咁前進。」對於今場入波嘅3名球員，都係列納上任之後羅致嘅，佢就話：「邊個入波唔緊要，最緊要係入到波同贏波啫！」