北京吹風2017年普選特首要設篩選機制，將心目中認為非愛國愛港人士篩走，目的當然係確保入閘提名的係自己人，即係伊朗式選舉，候選人報名後由憲法監護委員會進行篩選，成為合法候選人名單，再供伊朗選民普選。
如果北京真係要事先知道選舉結果，必定唔會容許泛民入閘，究竟世界上有冇一個制度，既可執行政治背景審查，又可符合普及而平等的普選定義呢？有的話，不妨告知小弟。呢一次香港人要攤牌，因為實在已無藉口接受一個假普選制度。
北京玩手段 無心搞普選
如果大家接受了有審查嘅假普選，即係中央會欽點2至3個建制派候選人，而且在人選上已刻意製造出對比效果，如李慧琼對劉江華，大家會揀個冇咁衰，感覺上有得揀，實際上係假選擇，但2017年選出之特首已可聲稱有普選民意基礎，行政機關會更為所欲為，議會要制衡更難。
戴耀廷提出佔領中環，就係睇到北京冇誠意搞真普選，有意將時間表一路向後拖，拖到15年先提出一個保守嘅篩選方案，到時香港人唔收貨，泛民唔收貨，北京就以時間緊逼關係，將局面變成all or nothing，一係要、一係唔要，冇討價還價餘地，最終立法會表決時，泛民否決方案，結果原地踏步，繼續用番2012年1,200人選舉委員會模式。而因為2017年普選行政長官流產，當年人大決議係先有行政長官普選，才可進行立法會普選，2020年立法會普選自然玩完。再等下一屆，已係2022年行政長官選舉。
佔領中環係要製造一個對峙局面，當中必定有風險，但呢個局面係迫使每一個香港人，以至中央領導人，都要認真思考2017年普選議題，唔好再拖、再玩手段去愚弄香港人。戴耀廷一代經歷基本法起草及諮詢、八九六四、九一直選、九七回歸，一直等等等，20多年，由大專生已變了50歲中年人。呢20幾年將溫和知識分子逼到激進化，又豈止戴耀廷一人。
他一吹雞，大家已無拒絕理由。
添馬男