各位觀眾，以下係一則喜訊！無綫新聞女主播羅若安前日結婚，唔少電子傳媒都有到賀。女主播出嫁，場面非常熱鬧。當羅安爸爸將個寶貝女交畀新郎哥時就已經忍唔住喊，march out時兩父女相擁喜極而泣。最開心嘅拋花球環節，羅安大力一拋，花球落咗去彭國柱女友身上（係呀，佢哋好快就會拉埋天窗），但羅安臂力太勁嘞，花球跌咗落地，好在彭國柱女友都執得番。
黃大鈞做MC
新人喺銅鑼灣世貿中心擺咗成23圍，成個婚禮TVB團隊都有出力㗎，陳嘉銘幫手拍攝花絮、彭國柱負責剪片、黃大鈞就做MC兼買酒。一對新人將會去新西蘭度蜜月，真係恭喜！恭喜！