新片《北京遇上西雅圖》前晚喺九龍塘舉行試映會，女主角湯唯因為喺上海拍戲，只能以視像同大家傾偈。相信大家對男主角吳秀波同導演薛曉路都唔係咁熟識，好彩有歡樂孖寶王祖藍同「細細粒」陳嘉佳現身撐場。問祖藍點解唔帶女友李亞男嚟睇？佢話：「我女友咪細細粒囉，亞男去澳洲登台搵錢，遲啲陪佢睇多次。」
錫住拍檔
祖藍同細細粒喺現場扮湯唯拎住吳秀波嘅紙牌公仔，大大隻嘅細細粒攬住祖藍條腰，祖藍硬晒軚，好搞笑。有人問細細粒點解又肥咗？祖藍幽默搶答：「咁問法，同問我係咪矮咗冇分別。」細細粒話自己縮肚同凸肚有好大分別，扮大肚婆絕對冇問題。湯唯話扮大肚婆係鍛煉體能嘅好好機會，套戲喺溫哥華取景，佢形容係浪漫之旅。
撰文：洪紅克
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/