內地上周五公佈2月出口數據靚仔到暈，按年增長21.8%遠勝預期，但當日亞太區股市反彈，A股依然弱過藥煲，因為睇埋進口數據按年倒退15.2%，就發現內地經濟似乎唔係好掂。
港股就升320點，表面睇似乎好勁，但咁唔好彩俾晉佳講中，藍籌股真係跑贏非指數股份，反差大到揸住二三線股根本冇乜得賺，幾乎只得藍籌「一注獨贏」，就連最受惠出口大增嘅航運股都炒唔起。
咁嘅市況，策略上可以跟買啲強勢藍籌，大注博穩陣小贏，亦可小注買唔跟大市走嘅冷門股，見升就追二三線熱門股，但隨時踩入假突破地雷，認真要小心。
上周五揀完冷門股，今日要順應潮流揀吓藍籌股，但見上周五資金似有開始遠離資產股的現象，其中新世界發展（017）、新鴻基地產（016）、信和置業（083）都逆市跌約1%。至於持有國際性業務嘅和記黃埔（013），同和黃業務佔比大過地產業務嘅長實（001），股價仲有得升超過1%；太古A（019）亦逆市升1.5%，而佢持有80%嘅太古地產（1972）就下跌2.2%。資金似乎當香港資產概念係子彈咁避，作為散戶，惟有跟住避。
中線藍籌股首選
簡單啲睇，內地出口數據靚，印證外圍經濟唔錯，但係進口差，反映內地經濟麻麻。配合呢個思維揀藍籌股，就要揀同本地地產無關，同時有唔少海外業務，又唔使靠強國需求，屈指一算，呢類股份冇乜幾多剩，和黃應該係表表者。
和黃盤數不嬲難計，又3G又屈臣氏又碼頭業務，仲要有個勁得嚟估佢唔到嘅財務部門，所以晉佳都懶得計，只係信得過超人同Canning嘅經營能力同眼光。至於估值方面，券商平均預測和黃2013年市盈率13.57倍，又唔係貴，今年內有上升空間。雖然技術走勢同滙豐控股（005）拍埋好鬼似，但睇怕點都值揸過主打新興市場嘅滙控。藍籌股當中，和黃可謂中線首選之一，以16倍市盈率計價，中線可以睇100蚊。
晉佳
本欄逢周一、三及五刊出