財爺早前的一番中產言論，除了為他帶來無數問候之外，亦多少令到自以為比上不足比下有餘的「中產人士」很不安，究竟甚麼是中產？我是否中產？若果我是中產的話，為甚麼日子還是過得很不中產的這些問題，實在很值得你我深思。想了兩天，卻發現這問題猶如「活着為求甚麼」般虛無飄渺，於是我決定放棄胡思亂想，而朝着另一境界進發。
「我好中產！」呢句話若果係發乎內心嘅感受，實在係幾寫意嘅，之但係我哋香港人定位中產，卻係在乎同其他人來比較，正所謂人比人比死人，家陣仲有個年薪400萬嘅財爺同你比，對大家心靈傷害可想而知有幾深，所以呢橫掂冇得比，不如唔好比，索性為自己搵第二條出路，第二個定位。
成年人做運動，除咗少數仲係因為想要認叻之外，大部份都因為其實明知唔會有得贏之下，一為興趣二為健康而享受運動，一入咗運動圈子，無論你玩邊瓣，都即刻會變得無大無細。邊個叻啲邊個差啲冇乜所謂，因為參與咗之後，你點都會享受到過程，自不然就成為咗贏家。
當今社會之上，除咗做善事之外，借問一聲有乜嘢係好似體育咁，每位參與嘅都會有所得益呢？當家陣政府出乜都死嘅時候，點解唔大大力加強推動多啲全民得益嘅運動呢？不過與其等佢郁，不如自己郁先啦。
我朋友間公司就行先一步，決定為同事着想，推出運動辦公室套餐，計劃包括：1彈性上班時間，逢深夜波之後翌日可遲兩個鐘返工，遲兩個鐘放工；2喺公司撥出雜物房放單車；3係5日上班，但一定要上載運動時間，最少嘅周一請食飯；4係將洗手間改建一格做更衣室，方便返工前後改做運動look；5係以公司名義book場打波兼報名公開比賽，練波打波及打氣的心機時間全部當OT，輸波贏波之後一律有餐食；6係每年bonus可以揀現金，或者揀價值更高嘅全公司去睇波朝聖，唔使下下等曼聯來香港先有得睇，如此的一間運動辦公室，人工唔使特別高都好多人想入去做，因為自我感覺良好，係咪中產又有乜所謂吖，橫掂公司都有免費咖啡飲。
keyman
now TV主持
mailto:[email protected]