歐陽震華（Bobby）聲稱早前因嗆喉引致急性肺炎被送入深切治療部（ICU）搶救，半隻腳踏入鬼門關，幸最終康復。Bobby昨日復工拍新劇《情逆三世緣》，獲拍檔娥姐關詠荷送上膠喉、果籃慰問，Bobby一見膠喉即大叫怕怕。
歐陽震華聲稱於年初三因食得太快嗆喉搞到急性肺炎，但亦有指他因豪飲而中酒精毒，要送入ICU搶救，留院11日後出院休養。昨日Bobby為新劇《情逆三世緣》到將軍澳電視城復工，他笑稱要錫娥姐一啖，兩人來個深情擁抱；娥姐、黃智雯和敖嘉年等人更送上膠喉、果籃、雞精與心意卡，娥姐笑說：「我係代表你老婆同fans送條膠喉畀你，警戒你唔好再放入口。」被嚇得儍笑的Bobby說：「呢條係尿喉，其實係膠喉，𠵱家見到喉都驚。」隨即掟開條喉。
唔關飲酒事
Bobby表示現在作息定時，晚上11時前便回家休息，他說：「𠵱家健康晒，對眼冇以前咁黃同有紅筋。」大難不死的Bobby獲無綫體恤，開廠景就冇外景，有外景就冇廠景，Bobby續說：「以前拍劇係超負荷，經過咁多年洗禮，以為自己好強壯，可以瞓2、3個鐘，雖然呢套劇有8個鐘畀我瞓，但計埋車程、睇劇本，實際只得4、5個鐘。𠵱家我日日都安樂醒，所以keep到個肚腩，係塊面瘦咗少少。」問到醫生是否叫減少飲酒？他說：「唔關飲酒事，唔好食得太飽。」
太太陪北上
Bobby指太太昨日準備愛心雲吞和腸粉，並笑說：「真係九唔搭八，不過最重要係有愛心，我以後會愛錫佢多啲，今次真係嚇死佢，𠵱家一日攬住佢錫，從未試過咁恩愛。」不怕太恩愛搞出人命？他笑說：「下round生個龍仔。」由於Bobby入院，《情》的佛山外景延至下月才出發，預計去20日。問Bobby會否請看護？他說：「大陸好多，年青貌美，不過係男看護，其實太太都會去。」
對於張家輝憑《大追捕》入圍金像獎爭影帝，娥姐說：「平常心，入圍已經好開心，不過我要去佛山拍外景，去唔到頒獎禮。」女兒由誰照顧？娥姐笑言叫家輝帶女兒行紅地毯。
採訪：黃曉妍
攝影：陳俊強
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/