兩個月前知道喜萬年可能在5月停業，最近又知道置地廣場約克大廈嘅Three-Sixty會停業。退休賓架Ｈ係喜萬年一位股東，我地經常在喜萬年吃乳豬，飲老火湯，天婦羅東星斑，菜式有新有舊，吃得好過癮，既然結業在即，呢兩個月不妨去多幾次。賓架Ｈ話：「我地唔會閂門嘅，睇吓搵唔搵到適合地方，適合租金，再起爐灶啦，如果在灣仔區復業，相信一班舊客唔會散失嘅！」說得有理，喜萬年主席呂少文係港澳馬圈名人，佢在香港養嘅馬，有「豪情」系列，現在有一隻「千杯豪情」，與餐飲界好夾啫。
喜萬年所在地係「熙信大廈」，由華懋集團擁有，熙信大廈曾是灣仔地標，今年78歲嘅金融投資專家Ｒ在1972年回港為萬國寶通銀行電腦資訊部工作時，就係到熙信大廈返工，萬國寶通（現稱花旗，即係恢復民國時期嘅中文名字）嘅零售消費銀行（Consumer Bank）就以熙信大廈為總部。當年喜萬年在熙信頂樓有中式夜總會，晚上好多金融界與商界高層「攜女」到場，都唔知幾熱鬧，依家冇晒呢啲情況咯。華懋有意拆卸熙信大廈重建，要在五月截晒所有租約，至於到時會否以短期租約續租，仍然未知。
約克大廈嘅360，生意好好，要搬當然唔係因為蝕本啩，而是位於最值租之地，內裏名店多如繁星，一間超級市場，無論生意幾旺，點都唔夠啲字母名牌競爭嘅啫，即使係牛奶集團一部份，置地公司附屬，都冇情講。其實超級名廈之內有一個高檔食物超市，以賣有機食物為主，在中環肯定生意不愁，且會方便其他大租客（例如銀行、律師樓）嘅僱員，增加寫字樓嘅吸引力，可惜吖，呢類「無形價值」好難入數，花碌碌銀紙先至係有形。三月三日到尖沙咀美麗華商場B1嘅商務印書館參加桂徵麒新書發佈會，行落B1，見到好多人喎，唔怪得商場內有A/X Exchange，萬寧等連鎖店，但後來發覺所有人都行入商務，商務外面嘅商場舖面就好寧靜，即是話：商務為商場帶來人流，並非商場為商務帶來人客！如果我係商務話事人，可能膽粗粗咁，要求業主收取特惠租金，商務直情係明益美麗華商場啦。