2008年甄子丹《葉問》，繼功夫傳奇人物黃飛鴻之後，葉問被視為第二個可觀性甚高的電影人物題材。
2010年甄子丹《葉問2》，可觀性題材，叫好叫座，第二集是乘勝追擊！
2010年杜宇航《葉問前傳》，是以少年葉問為主題的葉問系列電影。
2013年梁朝偉《一代宗師》，故事由主角葉問出發，透視同期一代宗師，亦透過電影入面唯美鏡頭和雋永的台詞，觀賞不同的電影世界。
2013年3月28日黃秋生《葉問——終極一戰》人物傳記，用寫實的手法，講述晚年的葉問，在香港弘揚詠春，桃李滿門，借葉問存活動盪時代做背景，勾畫人應有的氣道。
《葉問——終極一戰》賣點是黃秋生，他說 ：「我覺得葉問嘅葉問冇人拍過，今次我係做葉問嘅葉問，唔係做黃秋生嗰個葉問。」明不明？不重要，黃秋生的意思，應該是叫你去睇！
撰文：楊潔雯
導演王家衛上月在柏林電影節被世界各地的媒體追問一個問題，點解要拍電影《一代宗師》？因為一個背影，然後……
導演邱禮濤日前接受訪問，同一個問題，點解要拍電影《葉問——終極一戰》？導演表情愕然，然後竊笑說：「因為我拍電影！」簡單直接，之後他補充說：「個題材唔係我揀，葉問唔係個個拍得，係有個真人喺度，有個授權，當然我哋有人授權拍，然後我可以選擇拍唔拍，人哋又可以考慮搵唔搵我拍，我對葉問嘅事好熟，佢身邊周圍嘅事，我都好想拍，咪二話不說答應囉！」
隊酒後亂接戲
黃秋生又點解要演葉問？是因為一支紅酒，秋生說：「都係飲醉酒應承咗，口快快，以後飲醉酒唔好應承人嘢，嗰日下晝四點幾，我喺屋企已經飲咗一支紅酒，佢（邱禮濤）打畀我，冇開場白㗎！話開套戲葉問，我話：『又葉問？做乜嘢呀？』佢答我：『葉問。』我再問佢：『我問你我做乜嘢呀？』佢又話：『葉問呀！』我又再問佢：『我唔係問部戲呀！我係問我係做乜呀？』佢好肯定咁話：『葉問呀！』我即刻話：『吓！唔係啩？』然後佢就話要講個故事畀我聽，聽完我又覺得好喎！勁喎！我仲話：『你都好夠膽喎！』佢再問我點？咁我咪話：『都好呀！幾大挑戰呀！』跟住我繼續飲，第二日起身諗番起佢打過畀我，我記得好似應承咗佢啲嘢，跟住再諗吓，唔係喎！摷吓書先，即刻覺得唔得喎！點做呀！大佬！」
邱禮濤乘虛而入，黃秋生一諾千金，由不可能變成可能，秋生說：「我嗰時個樣，大肚腩，葉問瘦到成個道友咁，點做呀？家輝就差唔多，瘦到好似家輝咁，我做唔到喇！大佬！ 」然後，秋生被黃老闆和裁縫秋上身，即場演繹棟篤笑，故事是黃老闆去裁縫店搵裁縫秋做衫，帶鄉音的黃老闆說：「阿裁縫秋呀！我同你訂一套呢，康熙年代繡金絲金龍龍袍，得唔得？有冇挑戰？」裁縫秋興高采烈回答說：「有呀！勁呀！犀利呀！一世人都想做一套。」黃老闆打蛇隨棍上說：「一於咁話喇！落訂喇！」裁縫秋定神過後，反問黃老闆說：「喺邊度買呀？點做呀？」
急減磅壓力大
以為故事未完，秋生又跳回來，繼續說怎樣做葉問：「嘩！大佬你畀嗰嚿錢，做幾多工夫呀！真係蝕本呀！我做嘢成日走來走去，淨係冼師父送畀我支木樁嗰啲運費夠我買四個樁，準備咗成年，又唔食又擔心喎！拍嘢天氣凍，唔食又唔得，唉！同自己講過埋呢幾個月先喇！但係又要keep住，好喇！過完個冬天又係時候減，但唔夠時間，冇精神又有壓力，係好多嘢，唔係淨係外形咁簡單，好似《頭文字D》醉酒佬淨係醉酒，漫畫又冇人知係點，冇咁多工夫囉！呢套劇外形、劇本分析、武術、改自己造型，點樣做得神似，太多工夫喇！」
秋生減磅，「形」似葉問，「神」似應該不單止是一腔佛山口音，不過，提起戲中的佛山口音，不由自主地想起有鄉音的麥兜校長，機警的秋生意識到話題將要扯到麥兜校長上，他先下手為強，說：「葉問係咪咁講嘢我唔知，有好重佛山口音我係一定知，總之我就係盡量做葉問嗰個葉問，唔係做18歲長頭髮嗰個，或者落咗嚟香港同啲阿差打波嗰個，不過嗰個葉問冇人知。」
回歸人民價值
《一代宗師》的功夫是一橫一直，好簡單；《葉問——終極一戰》是透過功夫去確立人性，講人性，好複雜，邱導演說：「喺當時嗰種人與人之間嘅關係，一個有才能、有才華嘅人，喺嗰個動盪時代，點去處世生活，雖然嗰個年代生活艱難，人與人之間深信人民價值，同今時今日，人人數字化，全部都係錢，錢係重要，但係唔使樣樣都錢，用呢個度量衡嚟計。」
葉問的詠春是一個可塑性高的電影素材，五年拍五部電影，未計電視劇，不多亦不少，但是有少少悶，邱導演說：「冇所謂，咪拍囉！有人肯投資，有人睇，有人拍咪拍囉！即係每個題目可以好多嘢，可以用唔同角度切入，即係如果話葉問多，但係拍到我哋死都唔夠黃飛鴻多喇！多唔多唔係一個問題，有冇可觀性，有冇新角度，有冇新切入點，我覺得緊要啲。」至於因醉酒答應做葉問的秋生，如今同坐一條船，一於死撐到底，他說：「有幾多套呀？得嗰五套，我覺得係葉問嘅葉問冇人拍過，所以我話做葉問嘅葉問，唔係黃秋生做嗰個葉問。」
黃秋生，重複講了兩次，你明唔明？
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/