浩倫農科（1073）勁低PB、PE，加埋農業股未認真炒過，浩倫有機會接力環保股起飛。兩會期間，阿爺講明扶農政策係「重中之重」，嚟緊應該有新政策出籠。有國策back up，農業板塊會係炒友另一樂園。睇番浩倫，最新PB得0.2倍，場內近磅嘅中化化肥（297），PB上到1倍、世紀陽光（509）高達1.4倍。浩倫PB已經平到不得了。又浩倫啱公佈2013年半年業績，純利增長咗20%到1.6億銀，已經超過2012年全年度純利1.4億銀。保守當浩倫2013年全年純利，只係keep住呢個半年度純利數額，PE得兩倍幾。買浩倫，博翻半番到0.60元，PB都係得0.3倍，PE 3倍幾，未有耐上到同業平均12倍PE水位。
百富環球盈利勁
百富環球（327）嚟緊星期四公佈2012年度業績。集團主打POS終瑞機解決方案，食住祖國龐大消費市場，加埋阿爺「十二．五」推出8億張社保卡，間接助長電子化交易，而二線城市發展，碌機刷卡嘅非現金支付消費模式，需求有增無減，百富環球肥仔水。集團2012年度純利係咁意增長25%，到近2.3億銀，預期PE得8倍幾，上番10倍到2.30元，要升20%。
錢雋