若自問是少爺占（甄子康）的忠實擁躉，都應該知道誰是陸家俊、王鳳女士和朱艷強，他們都是阿占創作的廣播劇主角。早前自揭已婚七年的少爺占下月開talk騷，為滿足大家，他事先聲明會大講婚姻關係；而少爺占又會化身攣豬豬朱艷強走上舞台鼓勵一眾「自基人」齊齊出櫃，做個快樂的攣人！
撰文：李珮洳
少爺占在早前情人節自揭已婚七年，一眾陰謀論者開始聯想到，此舉是為了宣傳下月在新光戲院舉行的「少爺占朱艷強口口笑之Super me」talk騷，阿占日前接受訪問時大加否認說：「如果要谷飛，我以前都做過好多騷啦，使乜留番今次先谷。跟住啲人又會話因為今次係我個人嘅騷，咁我又想講，喺我宣佈已婚之前個騷已經爆咗啦，冇嘢要谷，只係因為呢幾年太多人問我幾時結婚，覺得係適合時候咪講囉。」
講盡感情生活
日前有篇關於阿占開騷的報道刊登後，不少網民留言批評「你結婚關我乜事」、「冇人想睇你講埋啲白癡嘢」。阿占指自己一向不會理會，故此不會為此感到不快，他反駁網民說：「佢咁講，所有娛樂新聞都唔關佢事㗎啦，我相信入場都係支持我嘅fans，我亦相信佢哋都想知道我嘅事，呢樣嘢已經足夠，冇可能討好晒所有人、冇可能所有人都鍾意我。」阿占表示騷上會提及自己的感情生活，他更笑言自揭已婚後，會叫太太近來不要着平底鞋和鬆身衫，他說：「我提咗佢啦，啲衫有咁緊得咁緊，行路行快啲，同埋行路時千祈唔好用隻手掩住個肚呀。娛樂圈個pattern就係咁，拍得拖耐就問幾時結婚，結完婚第二日就即刻改問你幾時生仔，所以嚟緊我都係會不停被問幾時生BB呢個問題。」
今次talk騷中，少爺占會分飾攣人朱艷強，原來阿占曾經被懷疑過是同性戀者，他說：「之前有啲唔開名嘅報道，話阿倔（尖的相反）係基嘅。其實我身邊有好友同埋做嘢嘅人都係gay friend，當中攣人多過直人。咁多年我都唔會歧視同性戀，我仲發現好多同性戀者諗嘢都好樂觀好正面。」
做個快樂攣人
少爺占指創作朱艷強這個角色，是想借助一個快樂的攣人，給大家帶來正面訊息。提到身為阿占上司的陳志雲多次被指圍繞身邊的都是男性，性取向一直被質疑，問阿占會否請陳生上台問個明白？他說：「唔使叫陳生上台啦，我夠膽問佢㗎，不過留番去廁所撞到時先問啦。」
少爺占在騷中會化身成朱艷強，他呼籲身邊所有「自基人」，可於下月10日至21日到新光戲院宣佈出櫃，他說：「每晚機會只有一個，邊個圈中人想上台大大聲講『我係同志』，就可以預先同我講，場數有限呀，唔好錯過呢個機會啦。」少爺占表示已經邀請了很多「自基人」朋友睇騷，更透露了其中一位的特徵，他說：「佢係一個唱作歌手，成日都拎住個木結他上台唱歌，唔夠5呎3吋，我只可以講住咁多先。」
大爆朋友私事
以往開talk騷的藝人少不免要爆朋友的私事，少爺占強調會爆一些好笑但又不傷害朋友的秘密，他說：「身邊好多攣friend自動提供笑料同題材畀我，有好多都係圈中人，係邊個當然唔開得名啦，大家到時自己估吓啦。」少爺占又希望睇騷的朋友會根據他所喜愛的dress code到場，顏色及風格一定要切合「自基人」的style，當問到少爺占是否一看便知對方是「自基人」？他說：「鍾意林憶蓮就一定係㗎啦！」
場地：韓點（銅鑼灣）
服裝：PUMA
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/