說斷捨離如何改變人生通往幸福，我知道，很匪夷所思。無論如何，將家居打理得簡潔清爽，總不會是壞事，尤其香港地方如此細。香港人，喜歡抱怨得到的少，很少注意是自己慾望太濫。一間屋，是人住還是東西住？地方變不大，惟有將慾望縮細。勤於丟嘢，忍心謝絕無謂嘢，願意落實一套去蕪存菁的心法，幾百呎蝸居，都可以令人覺得寬敞自在。
記者：劉嘉蕙 攝影：劉永發 部份為網上圖片
少嘢難過儲嘢
香港有很多「儲嘢人」，要找個有正當職業正常收入的「自願性少嘢人」，原來很難。
好不容易打撈到Rex Koo，設計師、36歲、有自己工作室、在大學教書、替潮店做設計、一個人住。男生的黃金歲月，大有條件喪買。他562呎的家，卻簡潔得像示範單位：幾乎所有設計師都大手收藏的DVD，他只聊備幾格放在客廳；書沒錯是有一整櫃，但擺放有系統；空出來的一間房，他用來晾衫；以為設計師的家都有雜誌，「我唔睇。」他說：「很多資料上網有，買雜誌好嘥錢，因為你其實不會翻看。以前我有買，發現自己不會翻看， 且越積越多，所以後來不再買。」
愛整齊，Rex說也許是遺傳基因，童年就對「邊個櫃放乜嘢」很有想法。做設計和插畫，真正大規模掉嘢，是搬出來自住的事，新居面積是舊居一半，東西塞不下，只好掉，「過程中發現，許多東西根本不需要。」
像甚麼？Portfolio。「放了十年，冇睇過一眼。初做設計時愛玩LOMO，影超多無謂嘢，掉晒。」衣服。「好多着了一兩次就唔着，好浪費。」DVD和書。「賣得就賣，但其實好唔抵，只換得幾十蚊。」分開方知愛不夠，浪費彼此光陰。「之後醒覺，買嘢要諗清楚。」
執屋是慳時間
跟都市人講執屋，大都皺眉頭，藉口總是冇時間，Rex說，執屋是慳時間，像他處理DVD，會跟種類及導演排、常看的喪屍片放前面、哪天忽然想看甚麼，一拎就有，「會覺得執屋花時間的人，是本身亂，忽然大轉變，才要多時間，我就冇困難，可能由細到大慣了。」
減少消費，就不用執也不用丟，但都市人，忍得手買嘢，未必能忍心拒收嘢。Rex坦言，人家好意送贈的禮物，未必次次鍾意，但有感情分，往往掉不下手，「像生日禮物、旅行手信，都是人家花心思準備，掉咗好似好衰。但想深一層，掉，是遲早問題，你收埋櫃桶，有日執屋，結果都係掉。」近年他學會叫相熟朋友不要送禮物；死都要送但唔啱心水，他就放公司，好歹顯示有你心。
斷捨離達人Steve Jobs
蘋果教主Steve Jobs應該未必聽過斷捨離，但其極簡生活哲學、十年如一日的造型，活脫脫就是天生的斷捨離達人。
年少時曾赴印度靈修的喬布斯，篤信佛教襌宗、食齋、主張物慾無益、抗拒物質主義。私底下Steve Jobs家居也是走素淨路線，尤其單身寡佬時代，因為找不到合心意的家具，家中連床都冇張，空蕩蕩的環境令他當年女友Tina Redse吃不消，成為分手導火線。即使婚後成為孩子的爸，Steve Jobs完美主義依然橫行，為買一台洗衣機跟妻子理論兩星期，爭辯「梳化的意義何在」，爭足8年。
失敗因為唔夠絕
知道斷捨離，常令人急不及待想去實踐。現實是「掉嘢」很難。旅遊作家陳俊偉就在專欄中提過自己嘗試的起心肝「斷捨離」，結果？「我會話係『未達到的成功』囉！」
陳俊偉幾年前在京都書店發現斷捨離雜誌，笑言三隻字有神秘魔力，「我屋企多雜物，平時看收納書，只會叫你買箱箱櫃櫃，但其實幫唔到，斷捨離是叫你掉晒無謂嘢，切中我最大要害。」
着手掉嘢，方發現寸步難行。陳俊偉是Home Office，平均一個月出差一兩次，每次帶回大堆旅遊資料，久而久之存量可觀，「最弊是真的會影響工作。311前的日本東北旅遊資料，我有一大堆，地方已經唔同晒樣，又好似好有紀念價值。」結論是唔掉得。
第二個敵人，是一系列旅遊局酒店航空公司紀念品，全部盛意拳拳，「最記得收過酒店送的硬皮紀念特刊，仲簽晒名。掉晒佢好似好絕情。」送畀人？「有想過。譬如商務客位送的travel set，我有十幾個，好多是名牌，送人好像很實用。但成大個航空公司Logo，人哋都知你唔要先畀佢啦。」想把心一橫掉晒佢，也有苦惱，「始終日本回收制度比較好，在香港除了垃圾房，都不知哪裏會接收這些。」
東西易請難送，陳俊偉決定擇日重賽，另一方面謝絕新成員加入，從根源着手，「見到旅遊資料，印得好靚，揭完就算，盡量叫大家用email不要畀實物；手信，最好買食得的，免得要keep。」革命尚未成功，他會繼續努力，「看過斷捨離，最大得着是意識提高了，現在看到東西想買，腦中都會浮現斷捨離三個字，都會買少咗。
