二月二十七日晚參加新城電台雄財宴，酒會上碰到不少商界、金融界知名人物，人名太多，不能盡錄，有趣談話亦多，不過左丁山被警告，「不能寫出嚟！否則以後斷線！」唔寫就唔寫啦，繼續做朋友要緊。入席後有一位美婦人趕到，就係永安旅遊嘅總裁梁港蘭，梁女士掌港永安旅遊多年，曾經離開過，自中資收購永安後，又請梁女士返去掌舵，可見旅遊專才的確不愁寂寞。與梁女士講起香港旅遊，香港人好似唔多歡迎內地遊客噃，認為香港承受不了噃，要求禁止一簽多行，一日多行噃，總之有一種情緒，就係認為香港旅遊業已經飽和，要停下來，想一想。梁女士話：「我地多數搞出外旅遊，對inbound（來港）冇咁熟，不敢評論。外地就多多歡迎香港人去旅遊呀，由政府最高領導人出面㖭，譬如我都係第一次體驗到，泰國總理英祿女士來港訪問，竟然撥出時間見我地旅遊界，請我地多多帶團去泰國，泰國對發展旅遊好有誠意，女總理親自出馬推動㖭。」
後來得悉，英祿來港訪問兩日，除與梁振英見面及到太古廣場購物之外，仲主動要求見旅遊界代表。於是東瀛遊、康泰、永安、新華等等十幾間旅行社代表與旅遊業議會總幹事董耀中一齊去酒店與英祿會面四十五分鐘，英祿希望香港人多啲去泰國旅遊喎。
說不定下次英祿到中國訪問，也會親自與中國旅遊人士見面，要求多啲多啲中國人到泰國自由行。我地嘅特首聽講就別有想法，大公報（三月五日）引述「可靠消息」話梁振英上京開政協會議，與不同部會閉門商討暫停「一簽多行」或「一日多行」，一於閂門趕水客，一刀切，連累埋有公事需要一日多行之非水客人士。政治上，凡有一件新政推出，或有一件舊政撤銷，往往好難恢復原狀（用聯儲局術語，入市容易退市難），譬如今日話不准一日多行，他日要恢復嘅話，必定有人反對，麻煩多多嘅！梁振英為求民望，不惜迎合民粹，先有港人港地，二有買樓BSD，三有禁止任何人攜帶超過兩罐奶粉出境，難道第四招就係「暫停一日多行」？如要耳根清淨，索性宣佈回復2002年沒有自由行嘅狀態就算啦。