自從黃曉明唔識陳偉霆係乜水後，唔少藝人明星嘅記憶力同認知力都退步咗唔少，好似黃秋生「不知羅志祥是誰」，鍾楚紅又唔識陳妍希，𠵱家連47歲嘅吳君如都話唔記得王祖賢係邊個，仲要佢哋都叫做合作過《豪門夜宴》同《賭城大亨II之至尊無敵》，到底係王祖賢唔夠紅定係君如記性差？
志偉潑冷水
有傳退隱十年嘅祖賢計劃今年重出江湖，曾同祖賢合作過幾部戲嘅王晶前日就率領君如、曾志偉、鄭中基、王祖藍到廣州宣傳新戲《笑功震武林》，對於祖賢復出喜訊，君如竟然話唔記得佢係邊個，仲即刻偷偷問志偉係唔係長髮好靚嗰位，之後即補鑊話：「好耐冇見佢，同佢合作過幾部電影，但都係30年前嘅事，對觀眾嚟講係新鮮吧！喺內地都成日重播佢嘅電影。」
而志偉就話年輕觀眾唔識祖賢，所以佢復出一定要認真揀劇本，更潑冷水話：「觀眾嘅年齡層變咗，睇佢嘅觀眾唔睇電影，而睇電影嘅觀眾又唔識佢。」王晶就話如果祖賢願意都想請佢拍戲，但一定要有合適角色先得。
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/