【隔牆對論】
記：《蘋果》記者 葉：葉世雄
記：是否認為謝鴻興拍枱是在侮辱美容業界？
葉：言論上未至於，但佢拍枱喝我哋啲同業走，咁就絕對係侮辱，佢唔係侮辱我哋個人咁簡單，係侮辱晒全個美容行業。
針對DR件，政府在私營醫療機構規管檢討督導委員會下成立工作小組，區分美容服務和醫學程序，避免有美容院繼續以提供「醫學美容服務」為名，不當地施行醫療程序，對顧客構成健康風險。小組成員包括醫生、美容業及消費者代表。
記：你認為政府成立的工作小組有何問題？
葉：首先係人數比例，最初成員名單明明係6個醫生對6個美容業人士，到開會時突然變咗11個醫生。開會文件亦列出咗34個例子要區分係醫藥治療定美容，包括肉毒桿菌注射、鑽石磨皮同洗腸等，我開會時問如果將來有呢34個例子以外嘅新技術又點？主席（衞生署署長陳漢儀）竟然話到時先算，傾嘢點會係咁傾㗎！
記：小組出現甚麼問題，以致美容業代表要退出？
葉：當然有！政府由始至終冇講明個遊戲點玩，主席話個小組毋須表決，只係交流意見，結果開完第一次會後，會議紀錄好多嘢都寫話小組成員同意係醫藥治療，你冇表決過程又點得出咁嘅結論。例如洗腸，我哋有代表只係話自己都試過，覺得洗完後個人健康咗，呢個只係一個普通意見，唔知點解最後份會議紀錄，話我哋同意洗腸係醫藥治療。
記：討論過程中有否覺得不受尊重？
葉：謝鴻興開會講過：「我使乜嘢尊重你意見！」喺我想像中，一個醫生唔應該咁唔專業，開口講到明唔尊重其他人意見呢啲說話，唔應該在會議發生，會議就係互相表達意見，真理越辯越明，但有人已經有前設，擺到明唔會尊重其他人意見，呢個人先唔值得被尊重。
涉美容服務的投訴罄竹難書，消委會去年首10個月共收到851宗有關美容服務的投訴，當中約一成涉及整容、注射及激光等入侵性美容服務。
記：消費者投訴美容服務不絕，你認為原因何在？
葉：最大問題係美容業有好多新技術出現，呢啲新技術唔係人人都掌握得到，但現實就係有人唔識都照幫人做，例如好多高能量技術，如超聲波爆脂機或RF（射頻美容），呢啲技術需要經驗及知識先用得安全準確。
記：業界代表退出工作小組，你認為有何更好方法研究規管醫學美容服務？
葉：小組成員已經失去咗互信，仲點傾落去？而且醫生唔等如一定識得用新技術，所以應該成立個強制性考核制度，激光、彩光同超聲波等技術通通都要考試攞牌先做得，連醫生都係，確保你掌握晒先得。你要規管一個行業，都要有適當嘅空間畀呢個行業嘅人進步，唔係一刀切乜嘢都唔畀做。
葉世雄以往受訪時表示，醫學界有意爭奪美容業的百億市場。有份參與小組的美容業代表，過去兩周先後召開記者會及遊行，不滿政府聯同醫學界於小組內逼美容業就範。
記：為何認為醫學界想侵佔美容業市場？
葉：邊個私家醫生唔係做緊商業？冇當係生意做嘅，你哋班醫生可唔可以統一收費呀？唔好攬住個道德高地，只識批評美容業，𠵱家根本係搶生意。
記：設立考核制度後，是否能避免DR毒針事件再次發生？
葉：DR件事本身係醫療行為，係由醫生注射物質入人體，本質上並非純粹美容服務，唔應該同美容業混為一談，食衞局長高永文自己都曾經話呢件事係醫療事故。考核制度係要確保使用嗰啲真正為美容而設嘅服務，係由對有關技術有認識嘅人負責。
記：你認為應如何區分醫學與美容？
葉：應該係從性質上區分，如果經過診斷，認為係為咗治療創傷而作嘅行為，就應該歸類為醫藥治療。一般為咗變靚嘅行為，例如脫毛，冇理由被當成一種治療，更冇理由只有醫生先做得。
mailto:[email protected]