「超力力力……」是70、80年代成長一代的集體回憶，當年，食正超人片盛行，拉長聲線扮回音，是無數小學雞之間的潮語，新近，這個經典懷舊廣告，又在電台翻生熱播！「呢個品牌，係爸爸幾十年嚟嘅心血，好想話畀人知，香港除咗福字麵，仲有我哋！」人稱超力女的莫傑琳（Diana），是接手家族生意的第二代，她直言，經典廣告對白，不單是香港情懷，也是她最敬愛爸爸莫國安的情意結！ 記者：呂麗嬋
「老竇創辦『超力』前經銷假髮，戴假髮最緊要就係黐住個頭唔甩，超級夠力！後來假髮業式微，佢轉到泰國設廠造米粉，就用番呢個名，紀念佢賺嘅第一桶金」。寶號由來，原來有段故！事實上，1972年創立的超力，是現時即食麵品牌中唯一由港人主理的香港品牌。我們每日在茶餐廳食的米粉，大部份都是超力的出品。
「70年代主力做零售，但連鎖超市上架費太貴，為咗生存，近年我哋主力做餐飲批發，供應粉麵畀茶餐廳同食肆」。
Diana是接手家族生意的第二代，與超力同年出世，老伙記都愛叫她「超力妹」，「老竇白手興家，大學選科我本來想讀化學，佢就越洋打嚟鬧咗我半個鐘，要我改讀工商管理，為接手生意鋪路」。
自言絕非罵不還口的乖乖女，但對嚴父卻又敬又怕，「爸爸嘅生意唔係一帆風順，三、四歲時試過大屋搬細屋，所以好細個就知老竇啲錢唔係咁易賺。細個爸爸唔畀我哋攤大手板，喺澳洲讀書，佢要我做收銀，自己賺零用錢！」
嚴父出虎女，1995年她在澳洲大學畢業後即被召回港打理超力食品，主理出口部門，20歲出頭就要一個人走遍歐洲，「出品要因應當地要求，又要了解唔同地方嘅衞生法例。但點困難都好，你咪以為嗲吓佢就會安慰你，老竇打嚟通常劈頭就問：『今日跑咗幾多個客？阿邊個你搵咗未？』」
早結婚 為唞吓氣
初出茅廬，被鬧到喊司空見慣，「放咗工入咗房，佢都要敲門問你搞成點！我27歲就結婚，其實係我同男友講不如早啲結婚，我想快啲搬出嚟住唞吓氣！」與老父活像歡喜冤家，鬧得再僵都好，睡了一夜，她又死死氣返工。
三年特訓完畢，正式接手家族生意，但Diana直言還是交了不少學費！「銀絲米粉係我哋招牌貨，試過為方便生產，將米粉餅由四方型變圓型，結果好多人打嚟鬧。仲有包味精，我唔識講叫乜嘢味，但食慣咗就有感情，每次食就係想食番嗰種感覺」。正如那句「超力力力……」也許不合時宜，我們也已長大，不再相信超人，但那種舊時味道、那種記憶，卻好永恆，更是無價！
超力經典廣告網址： http://www.youtube.com/watch?v=m_RwumeOENY