今日係三八婦女節，點都講番單同婦女有關嘅料。港交所（388）近期呼籲上市公司令到董事會多元化，包括引入多啲女董事，睇資料，發現長和系主席李嘉誠三父子一早睇好女董事幫到手，仲好捨得畀高薪留人。
長實（001）執董吳佳慶係佼佼者，佢經常陪住小超人李澤鉅去買地，地位超然，2011年年薪接近2,600萬元，多過「樓神」趙國雄，樓神當年年薪2,480萬元。比較低調嘅和黃（013）執董周胡慕芳，原來1993年已經開始做執董，2011年年薪4,478萬元。
至於小小超李澤楷，佢間電盈（008）搵咗位女士睇數，執董兼財務總裁許漢卿前年年薪1,111萬元；靚女樓神顏金施早年從太古地產（當年未上市）跳槽至盈大地產（432），年薪同樣過千萬。