今天婦女節，謹祝香港女士生活愉快，賣完口乖，各位亦可以繼續埋位做嘢。不過我喺內地啲女同事就可以放半晝，公司仲要準備啲小禮物𠱁佢哋開心；至於香港女同事就唔使諗，點都要捱到如常收工（若然冇OT），然後就要趕返屋企，一邊同個仔對功課，一邊聽個老公投訴個賓賓今晚煮啲餸又唔得，表面上係話佢，其實係畀說話你聽，監工不力。
入息 地位 與男性看齊
所以適齡女性選擇單身，或者不結婚豈會無因。而「剩女」現象亦不過是社會發展的副產物，舉世皆然，香港號稱先進城市，骨子裏卻是保守，「女大當嫁」還是很多人對女性的基本期望，當然仲有「相夫教子」的角色要求。事實上，過往「男主外、女主內」嘅觀念真係冇乜錯，所以丈夫係「外子」，妻子係「內人」，而啲「內人」根本就冇其他就業機會，唯一職業就係做好「賢妻良母」。
然而，經濟起飛造就強大的勞工需求，有同樣工作能力的女性當被各行各業吸納，勞工隊伍亦出現翻天覆地的變化。再者，女性受教育（仲要係高等）的比例大增，意味着她們與男性在職場較勁的條件趨強。女高層早已不是稀奇事，以我司董事局為例，女董事幾佔一半，而管理層更加唔止頂咗半邊天，有三分二都係女性！各位大抵理解我對女生「尊重」的品性何來。至於一般職場女性，普遍都能與男性享同工同酬，若有不公之嫌，相信嗰位「當自己」係主席嘅平機會醫生都會做嘢。
總之女性可在入息上與男性看齊，甚或高過，經濟獨立，自給自足，根本毋須依賴男人供養，即係掌握話語權，社會地位相應提升……如果冇結婚嘅話。因為正如文首所提，傳統的家庭觀念仍將女生規範為「打理好家頭細務，照顧好老公仔女」嘅。
你話有本事、有自主、再加上有要求嘅女性，又點會輕易就範。雖然喺香港做「剩女」總得有點勇氣，不然很難面對社會無形壓力，少不了就是傳媒的標籤揶揄，謹此亦為自己用上「剩女」一詞賠個不是。不過與其去面對窩囊老公，仲要睇埋奶奶面色，我想各位姐妹還是「剩」到底吧。
盧先亞