八方噚日見到醫學會會長謝鴻興，佢笑住話CY講錯嘢，「我睇BB仲多過佢（CY）睇電視啦！」何出此言？話說689特首前日喺北京為「限奶令」唔係民粹舉動解畫，「BB一直食用某一隻牌子嘅奶粉，就只適應嗰種牌子，轉奶粉係好唔容易嘅事」，仲話BB食奶唔似大人食米，可以轉牌子，甚至外出食快餐、酒樓都得。呢番話真係笑大謝醫生個口，「我都有湊過BB，仲係兒科醫生㖭，我見過咁多BB轉奶粉都完全冇問題」。其實醫學會上兩星期已經出過指引，話轉奶粉好平常，八方建議CY搵謝醫生補吓醫學常識先，否則民粹呢個標籤，搣唔甩㗎。