兩會期間，係建制派在京政治活躍期，北京也樂於借此機會，令一班港區人大政協，有種參與全國政治的快感。日前俞正聲會見港區政協，提到未來要愛國愛港陣營長期執政，香港傳媒也有報道。阿爺要自己人執政，理所當然，但實際上，愛國愛港陣營，是否具備長期執政能力，又是另一回事。
建制派唔打得 一事無成
我哋只要將港英時代建制派與回歸後愛國愛港陣營作一比較，便知當中差別。典型人物係范徐麗泰與李慧琼，范原本只係在理工做學生輔導工作，並非甚麼大學者、專業人士，1983年獲委任為立法局議員，1989年兼任行政局議員，其後出任兩局保安小組召集人，任內主要協助港府處理棘手的越南船民問題，此問題之難是英國、歐美、港府及本地社會均持不同立場。
英國宣佈香港成為第一收容港，但港府認為長此下去難承受，而本地人則反對香港做第一收容港政策，船民營暴亂時有發生。
當年港英有意培植范徐麗泰，用佢去游說取消第一收容港，實行甄別及強迫遣返政策。港府需要一個香港人作民意代表去處理此事，英國要面子，唔肯主動在人權、難民問題上後退，要開聲最好由本地華人去做爛頭卒。港英用人係要交功課，唔係高呼英女皇萬歲、尤德萬歲就過關。范太當日到歐美、英國游說陳情，推銷強迫遣返政策，又爭取外國多收船民，有實際工作成績。
另一個港英建制中人李鵬飛，港督委任佢做廣管局主席，佢手上功課就係政府已經決定禁電視煙草廣告，嚴重打擊TVB邵逸夫的利益，李鵬飛要擺平此事。
今日做建制派，真係happy過laughing哥，你睇重點培育李慧琼，今年38歲，身兼兩局，但公職表現同當年港英時代范太根本冇得比，范太38歲入立法局，44歲做兩局保安小組召集人，今日李慧琼冇一單大嘢可以孭起，只係做幫閒角色。
另一個蘇錦樑做兩任商務及經濟局局長，亦只係忙於主禮剪綵，一事無成。
如果2017年交畀呢款愛國愛港人士執政，香港點會有運行。難道北京至今仍然唔明，廢人比保守更可怕，香港人心知泛民欠執政能力，但眼前愛國愛港精英，又何嘗唔係一排一排硬膠花瓶。
添馬男