【銅鑼灣禮頓道】今年51歲嘅周星馳（星爺）投資有道，近十數年間不停炒賣豪宅兼買舖，令身家暴升，有人估計星爺𠵱家嘅身家已超過15億港元。最近星爺親自執導嘅電影《西遊．降魔篇》喺內地票房走勢凌厲，至今已收11億3千幾萬人民幣，票房僅次於電影《阿凡達》同《人再囧途之泰囧》排第三位，好多人都睇好星爺部戲有力再上。
碌卡笑騎騎
身為星爺阿媽嘅凌寶兒當然以個仔為榮，平時出街都會刻意打扮，唔好失禮個仔嘛。前日傍晚6點半，星媽喺銅鑼灣禮頓道出現，一身富泰look着住啡杏格仔連身套裝裙、配杏色加橙色嘅船底厚踭鞋，仲拎住個約值30萬元嘅Hermès鴕鳥皮Birkin手袋。
星媽入咗間有60年歷史芬蘭印花產品名牌Marimekko嘅專門店，呢間舖最出名就係花喱花碌嘅圖案設計，星媽好快就揀咗一個咕𠱸套同手巾仔，簽卡畀錢後仲同店員傾得好開心，似乎係熟客仔。買完嘢嘅星媽行咗去對面馬路，好快就有司機揸車嚟接佢走。
採訪、攝影：楊浩賢
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
http://hk.movies.nextmedia.com/