香港舖租越嚟越貴，莫講小店捱唔住，就連有幾家分店嘅酒樓都頂唔順。百樂潮州海鮮酒樓位於炮台山嘅分店最近貼出告示，今個月25號就會光榮結業，有茶客好唔捨得，向員工打聽，先發現業主將舖租加近兩倍，形同逼走酒樓。百樂潮州除咗喺炮台山，銅鑼灣同尖沙嘴都有分店。炮台山分店開咗7年有多，由於電氣道有唔少寫字樓，係唔少白領食晏好地方。好多熟客近日都把握最後機會去捧場，可惜八方噚日搵唔到分店話事人，問唔到佢哋係咪會另搵地方再開業。