政務司司長林鄭月娥早兩日大發雌威，突然畀封信立法會主席曾鈺成，投訴長毛喺財爺曾俊華宣讀預算案嘅時候掟嘢，直指咁樣係嚴重擾亂秩序，要深表遺憾，又攞《議事規則》「大」曾鈺成，話公職人員唔應該受到議員恐嚇或粗暴對待，最後仲要批評長毛嘅做法係「不檢行為」，損害立法會甚至香港嘅國際形象。
見慣風浪嘅曾鈺成點會被「大」到？輕描淡寫回信林鄭解釋，自己都關注長毛當時嘅行為，所以即席趕咗長毛離場。查實前政務司司長唐英年，過往亦曾去信曾鈺成，投訴議員唔應該向官員掟嘢；林鄭睇怕都係跟番前朝做法「做番啲嘢」，以示好關心同僚。