中港股市死氣沉沉，地球另一邊嘅美股就強勢破頂，相關概念股乘勢炒上，順誠（531）一支大陽燭突破1.35元水平阻力區，收報1.42元，升6%，成交超過九球創近三個月新高，呢棍絕對值得尊重，話唔定有後着。
乜嘢後着？唐牛覺得最大機會係公司發盈喜，春江鴨預先掃貨，事關順誠舊年上半年賺566萬美元（約4,415萬港元），已相當於2011年度嘅三倍有多。順誠主要從事傢俬產銷，九成生意來自美國，美股近期突圍而出，率先破頂，全因樓市復蘇帶來財富效應，順誠可謂食正條水。集團中期息4仙，年度化息率達5.6厘。大股東郭氏家族持股70.5%，再撇除基金持貨，街貨只得幾億股，要炒上話都冇咁易。唐牛曾於年初推介順誠，當於股價1.28元，兩個月累升11%，同期恒指跌2%，順誠明顯強於大市，彭博綜合券商預測，市盈率約18倍，美國樓市氣勢如虹，估值應可再提升，目標價維持睇1.60元。
唐牛