懷孕四個半月的潮媽應采兒（丁丁），昨日現身一個BB用品的宣傳活動，身穿娃娃裙兼白色三吋高跟鞋的丁丁，步履輕鬆。其間丁丁忍不住透露腹中的小小春是春仔。談到懷孕後的心情，丁丁坦言初期受荷爾蒙影響變得躁底，笑稱連聽到陳小春的呼吸聲都直情想殺死他。
潮媽應采兒昨日挺着巨肚出席在尖沙嘴舉行的BB用品宣傳活動，同場有懷B的黃婉君（Rosanne）和何倍倩等人，懷B的丁丁腰圓肚凸兼上圍升cup，更着上三吋高跟鞋在台上行show，不過依然健步如飛。問到BB的性別？鬼馬的丁丁先叫大家估一估，結果她忍不住笑說：「係生雞仔，春仔嚟㗎，佢（小春）好開心，不過我又想生女多啲，我會生多個。」丁丁被笑稱地位有如皇后一樣，她聽聞後笑笑口說：「大肚真係好偉大，我前嗰三個月真係好辛苦，加上又好似有好多禁忌，好似話唔可以揸鉸剪，有啲嘢又話唔食得，我都盡量唔做，第二胎就話之佢。」談到懷Ｂ後的心情，她說：「𠵱家過咗咪冇事，之前唔知係咪啲荷爾蒙影響，心情好差，好躁底，直情聽到佢啲呼吸聲都想殺死佢，啲男人成日話幾個月啫，忍吓喇，我咪鬧你知乜呀？你冇子宮唔好講嘢喇。」
最多餵一個月
丁丁還說BB的英文名將會由她負責，中文名則會找相士幫忙，她說：「英文名唔講住，本來我想改做『陳大春』或者『陳春』，但係佢話叫親個春字都會俾人打，仲話細個成日都俾人打，我都唔知點解，春字真係好奇怪！」工作方面，丁丁說：「我都唔知自己想點，𠵱家諗就好美好，有工作都會做，我阿媽就叫我唔好講到咁肯定，小春佢自己就想我湊仔，叫我出去做嘢，梗係冇可能喇。」丁丁亦讚小春很乖，不單止沒有在她面前食煙，而且亦經常陪在她左右，但丁丁仍忍不住說：「我都唔明點解我咁耐冇拍戲，佢又同我一樣冇拍戲，不過𠵱家接又好似太遲。」堅持剖腹生的丁丁，被問到會否餵人奶？她笑說：「大唔一定會有，𠵱家啲奶粉好好，佢都有逼我餵，或者最多餵一個月，事關餵人奶要戒口，我差唔多要飲酒喇，我忍咗好耐喇！」此外，何倍倩和黃婉君異口同聲地表示生B後會封肚收工。
採訪：何慧斯
攝影：仇志德
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
http://hk.movies.nextmedia.com/