人人爭着龍年添丁，已有一子的馬德鐘（馬神）趕得上尾班車，月前與太太張筱蘭和囝囝馬在驤在香港愛護動物協會領養了一頭被遺棄金毛尋回犬Rocky，全家視牠如孻仔般痛錫，雖然Rocky非常活潑，但馬神一聲令下，Rocky即乖乖聽話。
撰文：比華利
馬德鐘和囝囝馬在驤一直想養狗，月前他們終於如願，從愛護動物協會領養了一頭金毛尋回犬，替四個月大的狗仔起名Rocky。馬神難得趁年假回港度歲，早前與妻兒即帶着孻仔Rocky出外散步，享天倫之樂。
馬神自幼都喜歡養狗，可是礙於居住屋邨難圓夢，他說：「記得細細個阿爸試過執隻唐狗返嚟養，只係養咗幾日，跟住就唔見咗佢，因為我哋住屋邨好嚴。」高大的馬神對大狗情有獨鍾，貪牠夠型格。婚後都有想過養狗，他說：「早幾年囝囝太細，我同太太主力照顧好囝囝先，𠵱家佢都14歲，佢都好鍾意狗，我哋開咗家庭會議，一致通過添新成員。我哋屋企幾隻貓都係領養，即使養狗都主張領養，好想畀被遺棄動物一個溫暖嘅家，於是太太就着手去愛護動物協會搵狗。」
愛貓愛狗
馬太當日帶着囝囝去揀狗，兩母子與Rocky一見鍾情，她說：「Joe（馬德鐘）當時喺內地開工，我就whatsapp咗Rocky張相畀佢，佢見到馬上叫我辦手續，等Joe返嚟就接咗Rocky返屋企。」Rocky返馬家時才得三個月大，為了讓牠有規有矩，馬神安排牠接受訓練：「每星期去一次，有時間我一定全家出動，Rocky始終係小朋友，佢會好活潑冇時停，成日喺天台跑嚟跑去。」拍照當日，馬神解開Rocky的綁繩，甩繩狗跑唔停，不過當馬神父子叫喚牠時，Rocky又醒目乖乖歸隊，少主馬在驤更識做送上零食。
馬德鐘和太太張筱蘭93年婚後還未造人，高峯期領養了五隻貓，近年愛貓先後老死，每當家中老貓過世，馬太都會替牠辦寵物善終，收藏骨灰留念，現只剩19歲高齡的貓仔「二虎」。
二虎比14歲少主馬在驤還年長5歲，為了讓老貓有伴，數年前，馬太又收養了twins貓女MiMi和NaNa，轉眼牠們都4歲，三隻貓咪相處不錯。馬太直言最偏心二虎：「佢跟咗我哋太耐，好有感情。MiMi同NaNa年紀較細，性格活潑，Joe一拎吊鼠玩具，佢哋就會玩到癲晒。」
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
http://hk.movies.nextmedia.com/