多得卡拉OK，唔少港人都練到一副好歌喉。政務官場內亦有唔少隱世歌王，唔聲唔聲隨時有驚喜。政務官協會上月初舉辦「AO's Got Talent」比賽，有唔少唱得之人一鳴驚人；商務及經濟發展局獻唱高難度音樂劇《孤星淚》（Les Misérables）medley，力壓其他政策局奪冠。
商務局攞到No.1，同佢哋有位靚聲王、工貿署副署長盧世雄Brian坐鎮有關。據聞Brian喺比賽前夕，連日忙於處理奶粉風波，連練歌時間都冇，好在得天獨厚，拍住其他四位同事上台，仍然輕易以靚聲sure win，贏得全場掌聲。
另一位歌喉不俗嘅歌王原來係保安局常秘羅智光，當日佢同同事上台又彈又唱，包括神劇《天與地》嘅片尾曲《年少無知》。
譚志源為彈結他遲見CY
雖則保安局最終只得第三，屈居以年輕新紮AO為主打、以新樂器演繹經典歌曲如《新不了情》嘅食物及衞生局之下，但羅智光嘅演出已令好多同僚刮目相看。
雖則身為問責官員，但政制及內地事務局局長譚志源仍然心繫AO圈子，當日特別為該局上台彈結他伴奏，據聞佢仲因此遲咗去同CY開會㖭。財經事務及庫務局團隊領隊常秘區璟智就好鬼high，率隊上台大唱「錢錢錢錢」，最終名落孫山，但都攞到最佳台風獎。向來唱得之人嘅民政事務局常秘楊立門係表演嘉賓，獻唱《愛是永恆》，全場聽出耳油。如果呢班AO組隊開演唱會，八方相信都有唔少捧場客。
mailto:[email protected]