【捉錯用神】
為谷起A股，中央除進一步大搞RQFII（人民幣合格境外機構投資者），今次更放寬投資產品的限制，但昨日A股市場並不領情，全線報跌，有中資券商人士表示，過去半年，透過RQFII額度投資內地的對象，大部份都是定息投資產品，「除非中證監私底下講明要投資股票」，否則A股難以撐起。
「除非證監訂明買股票」
一名中資券商人士指，「中資機構全部都想向中證監邀功，諗盡辦法買晒啲額度，但由於A股波動太大，因此佢哋多數向客人推介定息產品。」他續指，中資機構多數向香港的中資銀行借錢，再以孖展形式貸款予客人，協助客人買內地的定息產品，「以5厘回報計算，由於以槓杆形式大手買入，回報可以好理想……但要叫個客買A股，就冇咁容易，除非中證監私底下講明要投資股票啦。」
事實上，昨日滬綜指反覆收低，全日收報2324.29點，挫0.97%，反映RQFII消息對A股刺激不大。銀河證券業務發展董事羅尚沛表示，RQFII已不是新消息，昨日只是進一步落實，內地股民亦不會此消息而太興奮。城大商學院教授曾淵滄認為擴大RQFII的投資範圍，雖對A股有一定的正面影響，惟要「煲起」內地股市則有一定難度，「主要睇佢日後可以放到幾多投資額度入去，要有更大的渠道畀熱錢返入去！」