恒地（012）主席李兆基（四叔）早排話，想將部份新界農地捐畀政府起平價樓，助年輕人置業，瑞信噚日出報告做占卜師，估計恒地嘅農地值298億元，四叔最有機會先私人買入新界東北嘅農地，再捐出來，仲可能喺未來三個月成事。
撐政府 幫市民 袋股息
市傳四叔有意買番恒地嘅農地，再以私人名義捐畀政府，恒地賣地套現所得，就派股息畀股東（四叔係恒地大股東，咁咪袋番轉頭？！）雖然只係傳聞，但瑞信就好認真咁計數，指新界東北發展區舊年進行第三輪諮詢，恒地喺嗰度有510萬方呎農地，最啱用來捐畀政府。
瑞信認為，呢單刁成事對政府、市民同恒地股東係三贏：政府可以加快新界發展；市民有平樓買；恒地股東有股息收。通過出售部份農地，市場對於恒地所有農地嘅估值都心裏有數，分分鐘刺激埋股價𠻹喎。