【中環歌賦街】現年45歲嘅魏駿傑07年娶咗重慶大學生張利華，佢哋個囡囡Jessica眨吓眼都兩歲幾。有指魏駿傑早前扑槌911萬入貨九龍城新樓盤匯賢閣，為囡囡入學設想而買樓。傑仔近年喺內地搞飲食同代理生意，間中登台賺人仔，佢都搵到錢夠養家。
食九記牛腩
傑仔前日下晝5點幾帶老婆同囡囡Jessica，一家三口出現中環歌賦街九記牛腩食麵，頭髮短短嘅Jessica好男仔頭，成個迷你版傑仔咁，由於佢着粉紅褲仔同鞋仔，先俾人認出佢係女仔。傑仔老婆張利華嘆完麵，仲帶囡囡去對面餅店買cupcake，傑仔喺門口等時，俾自由行認出，佢都冇say no親切合照。
傑仔招呼完粉絲就返入舖頭，Jessica揸住cupcake食到好滋味，嘴仔黐住好多cream，好得意。傑仔夫婦早前帶囡囡去西貢，任由囡囡赤腳周圍走，又當街除褲換尿片，呢次傑仔同老婆盡責好多，全程拖到實，買完cupcake就上番四驅車走人。
採訪、攝影：林妃
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
http://hk.movies.nextmedia.com/