狼振英老婆狼太近排吹雞，睇吓邊個地產商「識時務」，加入佢個廚餘組織「齊惜福」，新世界、信置同恒基派出富二代畀面加入，曾經係頭號唐英年支持者嘅華置副主席劉鳴煒卻唔肯歸邊，講明佢唔需要加入呢個組織，都一樣可以減少廚餘。
劉鳴煒噚日出席2013香港精神嘅活動時相當寸嘴，話唔一定需要參加齊惜福或者捐錢畀呢個機構，先至可以減少廚餘，「要減少廚餘，最緊要係自己點菜時唔會叫咁多，呢個係最好嘅第一步，我點菜時睇住自己有幾肚餓嚟叫，飽定唔飽都會盡量食晒佢」。
唐唐就快榮升做政協常委，劉鳴煒大讚唐英年夠晒資格。劉鳴煒揸旗嘅香港精神大使2013年開始接受提名，去年今日劉鳴煒出席同一活動剛碰上唐宅僭建，做咗快閃黨，今年就企定定做訪問，仲十分風騷㖭。