法國名牌LV（Louis Vuitton）為張洗頭椅、為個袋扣，狀告小商戶侵犯版權，要人賠錢兼登報道歉，事件開始鬧大，就連原本唔多關事嘅耀才證券（1428）都被翻舊賬。噚日網上瘋傳幾張相，相中係一個耀才環保袋，款式圖案竟然酷似LV嘅Damier啡色格仔圖案，耀才使唔使賠錢兼登報道歉呢？
「冇收過律師信」
耀才公關嗱嗱聲出來澄清，指相中嘅耀才環保袋已經係陳年物品，係2008、09年期間整嚟來送畀客戶，晨早送晒，𠵱家想搵個倉底貨都冇；當時亦冇收過投訴信或者律師信。耀才後來計劃上市，於是走去換個新形象，先至重新設計環保袋嘅款式，變咗白底紅字加黑字嘅款，沿用至今。
雖然冇俾人投訴，但耀才公關都要強調，舊環保袋款式冇侵權。係就係深啡加淺啡格仔圖案，之不過「啲格仔入面，仲有好多個格仔嘅」，因此，根本唔存在侵權問題。可惜，佢真係攞唔出一個倉底貨實物，齋睇相又睇唔出格仔入面有好多格仔。唔知LV方面睇到呢啲相有乜反應呢？
李華華
mailto:[email protected]