講開懷疑商標侵權，灣仔軒尼詩道、近油站附近有間粥麵店，原先叫做「翠華粥品」，𠵱家叫做「新華粥品」，翻查商業登記，翠華同新華粥品都係同一位姓黃嘅仁兄登記，照計只係改名，唔係換老闆。
李遠康：我知佢改名
無端端做乜改名呢？八卦走去問粥舖嘅夥計，佢哋支吾以對，總之就係有原因咁話。明眼人好易估到呢件事同貴價茶餐廳翠華（1314）有關，老闆李遠康接受查詢時，都話知道有呢間翠華粥品存在，亦知道間舖改咗名，至於係佢哋自動改名，還是李老闆手下叫對方改名，李老闆就唔多清楚了。
翠華市值57億，商標又有註冊，當然唔想有人亂用。舊年有隻新股叫創興集團（1322），掛牌前被叫停，原因就係創興銀行（1111）話佢個中文名涉嫌商標侵權，公司最後改用CW Group先上到市。