國際網壇呢排輪流打表演賽，繼蘭度、禾琪等嚟香港，拿度、細威到紐約，「1哥」迪祖高域亦到洛杉磯獻技，周一晚迪祖先鬥美國名將費殊，以局數7:2勝出，之後同名宿森柏斯合作雙打，但就不敵拜恩兄弟。賽前迪祖周圍玩，仲同湖人後衞拜恩合照。對於拿度復出，迪祖都好關心，仲話拿度已經回復信心，特別紅土場威力強大，好期待同佢再交手。