支持新界東北發展嘅上水鄉委會主席侯志強（侯強）講過：「你（政府）賠夠錢，祠堂都可以畀埋你！」噚日佢帶八方參觀鄉民夾錢復修嘅洪聖古廟同觀音廟，順帶一遊侯氏祠堂，繼續語不驚人誓不休，笑言賣祠堂都有得傾，若一個男丁賠番一億，佢哋個鄉400個男丁就有400億，「到時喺半山起個祠堂仲輝煌！」
侯強話大部份村民都想政府快啲收地，仲喺農地周圍種滿荔枝樹、龍眼樹，想等收地時賠多少少，笑指「荔枝都食咗十幾年喇，諮詢係咪要諮詢九代先做呀？」佢早前話反對發展嘅當區居民屬少數，「用機關槍去掃都死唔到十幾人」；佢噚日誇張到話，核彈拋落嚟都死唔到兩個人喎。