聯盟日前宣佈將會於亞洲再搞季前賽，火箭、湖人、勇士及溜馬，會先後到馬尼拉、台北、北京和上海作賽，聽見都覺得興奮。
興奮還興奮，回到現實，想要到當地睇波，可是難過登天。要同當地人爭，肯定爭唔贏，買超貴黃牛飛又只覺不值。再講旅費又是另一個問題，筆者並非一個月搵30幾萬的中產，作為一名升斗小市民，要在現場一睹林書豪的風采，只怕很難。還好，這個資訊發達的年代，有電視直播之餘，更有網上直播；買個league pass就解決所有問題，而且又可以安坐家中，不用同人逼，舒舒服服何樂而不為？睇電視或睇電腦，氣氛比起現場一定差得多；全場球迷一起投入為愛隊吶喊助威，這種事在家、辦公室裏一定做不到。而且多數在家睇波都是自己一個睇，隨時打到一半就已經嫌自己一個人睇好悶，轉台或者睇到瞓着，錯過一些精采場面，起身發現比賽已經打完，想起也會覺得浪費時間。
如果可以在香港搞季前熱身賽，那當然是最好。雖然場地問題一直存在，但筆者認為亞博其實是個理想的地方舉行季前賽；唯一問題是在中國這個巨大市場下，令香港變得微不足道。
現時NBA於亞洲地區最大的市場，就是中國；每個夏天都有聯盟中的超級巨星，到中國做宣傳，就知道運動商及聯盟有多重視內地市場。北上睇季前賽，或許會成為一個潮流，惟有希望有旅行社辦團，令喜歡入場睇波的球迷及筆者，可以方便一點吧。
《蘋果》球評家