噚日長實（001）搞今年新盤大晒冷，搵齊營業部阿頭見人，宏安地產前助理總經理楊桂玲（Moni）竟然有份列陣，伊人原來過檔長實兩星期，成長實賣樓部新丁。
Moni早年喺五大代理之一嘅鴻運地產任職市場部小職員，公司不敵97年亞洲金融風暴而關門大吉，Moni之後加盟已清盤嘅均來集團，後來再去宏安地產幫主席鄧清河賣樓，有15至16年賣樓經驗。
轉工嘅原因都係例牌答案：「想挑戰自己！」，首個幫手賣嘅樓盤，就係由長實投資董事劉啟文負責嘅大埔鳳園項目，呢個盤有超過1,300伙，喺𠵱家樓市氣氛下，都真係一個挑戰。