財務公司廣告有時都睇到都幾眼冤，呢頭稱兄道弟大唱「情與義，值千金」，嗰頭又話「易借易還」，講到好似送錢畀你唔使還咁，講到尾，咪又係「大耳窿」。最近「當舖股」靄華押業（1319）準備主板上市，仲掀起近年難得一見嘅新股搶購潮。睇番招股書，靄華整體淨息差高達37.2%，甚至比財務公司AEON（900）仲要高，食水認真深。
不過齋聽當舖兩個字，都已經夠old school。當然「二叔公」嘅存在，絕對可以補充銀行做唔到嘅需求，借一千幾百畀人江湖救急。不過靄華好多客都係低收入人士，公司增長潛力又可以有幾多？
靄華市值3億至4億元，都叫值個殼價，相信落場抽嘅散戶，十居其九係貪隻股細細粒，容易炒，唔通真係睇好當舖業務前景咩！再者呢類冷門股，前景好難估，高追隨時中伏，下場分分鐘好似抽米蘭站（1150）咁翻唔到身。咁唔知到時拎靄華股票去靄華當舖當，「二叔公」會唔會唔收呢？
Fifi
本欄逢周二、四刊出