美國經濟剛起步復蘇，道指已創新高，實在匪夷所思。分析員話金融海嘯後，企業大幅裁員減薪，削減成本，成果反映於去年業績，目前美股估值唔貴，仲有水位創新高。不過，節流始終有限度，今年企業點樣開源，令盤數再做靚啲先至係重點。
有睇開市的戰友相信都同意，近期個市走勢偏弱，指數向下機會較高，但唔少股份一再破頂，例如近日推介的佳景（703）、光宇（1043）及興業太陽能（750），升勢欲罷不能。通達（698）平靜數日後又再起動，要密切留意。
魏力1月初曾介紹國際精密（929），指業績將大復蘇，盈喜機會甚高，該股昨日突然大成交開車，成交額達2,277萬元，創兩年最高，股價飆升一成，收報0.77元。價量齊升，大吉兆也！
執筆時集團仍未發盈喜或公佈業績日期，但舊年3月7日出通告，20日發業績，故好消息很大機會於短期公佈，昨日春江鴨湧入的味道甚濃，坐轉順風車，應該搵到食。
2011年國際精密賺4,981萬銀，但去年中期已達4,631萬元，如下半年再多賺兩成，全年純利料達1.02億元，按年增長1倍，預測PE僅7倍，息率相信可近4厘，短炒睇0.85元，中線見1蚊，屬合理目標。
魏力
http://www.facebook.com/2012jason