人力資源管理學會剛公佈最新的企業加薪報告，年初調查期間訪問了46間，總僱用人數達5萬名的企業，即係平均每間聘用千人以上，與我司規模相若，正好參照。報告指出今年落實加薪企業的平均加幅為4.4%，銀行業加幅最低只有3.8%，金融服務與零售業相若，分別係4%同4.1%，而加薪最多的是建造業，幅度達到6.1%，怪不得官員可以此為由話乜算有地，都因為業內人手短缺而起唔切啲樓。相對大圍薪酬調整，我司總算比上不足，比下有餘，仍能緊貼市場環境，兼且勉強抵禦到通脹，而呢幾句好明顯係寫畀我啲同事睇。
加薪無關通脹高低
所謂「緊貼市場環境」，即係薪金待遇要有市場競爭力，其實僱主僱員不過就是「人力資源」這商品的買賣雙方。而賣方無論出賣的是勞力或腦力，最終都要有一個「你情我願」的價錢方可成交，唔通我哋仲有人係被賣落「火坑」或「礦坑」咩，況且現時有最低交誼費用的要求。不過整體而言，仍是市場價格主導。查實今天勞工市場的流動性豈是昔日可比，以前真係可以由此至終，「打死一份工」。做夥計嘅就算份糧多年原地踏步，亦只會逆來順受，因為搵工固然艱難，更加唔使講咩勞工權益。
隨着本港經濟騰飛，過往發展偶有阻滯，大體還是順風順水，近年失業率且是偏低，差不多係全民就業。東家西家若有同工不同酬，轉眼就會自然調節，也就是人才互動，所以一般公司嘅待遇條件只會與市場看齊。至於所謂嘅「抵禦通脹」原因，說穿了不過就是搵嘢嚟講。
猶記得去年「屐飛」聖誕前夕差點鬧工潮，皆因資方單方面公佈來年加薪只有2%，而工會當即表示不滿，要求加薪要追上通脹，平均幅度應達5%。並威脅採取一系列抗議行動，例如不向乘客微笑，以及考慮罷工等。最終在勞工處的斡旋下，傾番掂數，而乘客亦冇機會欣賞到空姐「不苟言笑」嘅真面。
通脹會增加成本是經營常識，增加的成本會轉嫁畀消費者也是常態，然而打工仔卻不一定因通脹而受惠相應加薪。吓，唔好噓，正如上面所述，人工從來都是有市方有價。「如果」，我話如果啫，各行各業都冇人工加，且人浮於事，縱使通脹肆虐，我深信勞力嘅叫價能力定大打折扣。工資嚟緊就話有30蚊保底，但薪金加幅從不設「最低」消費，一切都係「時價」。
盧先亞