曼聯同皇馬鬥得精采，16強次回合另一邊廂嘅蜜蜂兵團多蒙特鬥薩克達就早早分出勝負，完全冇爆冷意味。
首回合踢成2:2，以為薩克達喺西格納伊度納公園球場可以同蜜蜂兵團有得鬥， 點知呢支上屆德甲盟主踢起嚟超順，喺上半場中段6分鐘內，已經由菲臘比辛坦拿同馬里奧葛斯，早早領先2:0。到咗59分鐘，巴拉斯塞高斯基錦上添花，蜜蜂兵團最後大勝3球，兩回合計就贏5:2，自1998年後，再次打入歐聯8強。
多蒙特教練高路普賽後就非常冷靜，話爭標仲言之尚早，因為淘汰賽到較後階段就越難踢。其實，多蒙特今季衞冕德甲機會不大，始終落後榜首嘅拜仁慕尼黑成17分之多，所以叠埋心水爭歐聯好過，所以對住薩克達冇留手；計埋今場，多蒙特今屆歐聯4場主場全部贏晒，而且對手實力唔差，睇嚟下圈對手想將佢哋淘汰，就必定要喺主場攞得優勢，如果唔係作客到西格納伊度納公園球場就好難踢。