新一季中超聽晚開鑼，港甲「1哥」南華足主羅傑承周三就先喺球會部落爆料，證實陣中兩名愛將陳偉豪同李志豪，分別被青島中能及北京國安兩支中超隊以高薪斟介。雖然「雙豪」話明要協助球隊重奪聯賽冠軍，呢一刻唔會走住，但為咗挑戰自己，志豪表明自己季後好大機會北上為人民幣服務。
羅生上月中喺球會部落撰文，話有兩位球員搵佢，令佢好頭痛，佢噚晚深夜就終於揭開頭痛之謎；原來係陣中一對港足防線主將「雙豪」陳偉豪同李志豪，被兩支中超球隊高薪挖角。不過，羅生喺blog度講本來只諗住放其中一個，但結果「雙豪」分別同佢講，為咗幫球隊爭冠，目前已經拒絕轉會，令佢相當感動。
偉豪為家庭拒北上
事實上，偉豪被中超球隊相中都已經唔係第一次，佢噚日隨軍喺港會場操練後透露︰「當年（04年）南城事件後，已有中超球隊搵過我，不過當時停賽冇波踢，自覺唔fit就費事整衰自己同香港球員個『朵』而冇去。」時隔多年，偉豪今年已經31歲，並成家立室，佢講笑話︰「雖然我係一個浪子，但屋企有大有細，點都唔可以話走就走。我亦唔擔心日後冇機會，到時機成熟，條路又會自然走番出嚟。」
志豪認季後離隊
至於比偉豪細一年嘅「虎哥」志豪，雖然仲係鑽石王老五，但話晒喺南華效力12年，佢話點都要幫球隊贏番聯賽錦標，先再為自己打算︰「始終球隊失落咗聯賽兩年，好想幫球隊贏番，報答老闆。如果最終唔離港發展，都會喺南華踢到掛靴。」
不過，今年6月就約滿南華嘅虎哥坦言，港甲聯賽只得半桶水嘅水平，令球員好難有進步，有機會去其他聯賽搵食，的確要好好把握。佢又透露，北京提出比𠵱家高3、4倍嘅人工，有近6位數人民幣月薪，加上平均每場有3至5萬人仔贏波獎金，香港實在難以比較，所以佢承認季後都會把握中超二次轉會期而離隊。
神州港將越踢越好
雖然港足近年水平停滯不前，但上年都有4位港將衝出香港，北上神州搵食。當中高梵就最叻仔，成為繼吳偉超後，第2位港將登陸中超，加盟河南建業；只可惜呢位快馬最終幫唔到球隊護級，今季要跌落中甲搏命。至於陳肇麒同梁振邦兩位前南華兵，上季拍住上效力中甲廣東日之泉，雖然球隊表現麻麻，但見陳七返嚟踢港隊嗰時，越見成熟，就知中甲同港甲水平仍有距離；難怪吳偉超上年年尾都嗱嗱聲同飛馬解約，重返中國球壇同天津松江簽約兩年。