正所謂「唔怕生壞命，最怕改壞名」，相信中國旺旺（151）一定冇改壞名！公司2008年3月以每股3元，在港招股上市，短短5年，已直逼12元高位兼晉身藍籌股。主席蔡衍明更以600億元人民幣身家，成功在今年胡潤全球富豪榜排第十名，旺上加旺！
翻查旺旺過去三年業績，每年盈利都有增長，剛公佈去年全年多賺逾三成，全年派息急增近46%至2.86美仙，慷慨回饋股東。管理層更定下今年收入增長20%至25%目標。不過，摩通卻大唱反調，指由去年下半年開始，旺旺收入已轉差，今年根本不可能達標，仲話未來數月將密切留意，如果股價仲升，投資者就應該獲利離場，更預言旺旺將會跌番去9.50元！
高盛花旗一致睇好
此外，瑞銀亦質疑，旺旺去年銷量只增加7%，今年又唔加價，目標實在太過進取。估計利潤率已見頂，今年下半年將轉跌，都建議沽貨走人。
不過，綜合7間大行報告，大部份都調高旺旺目標價，高盛同花旗一致建議入貨，上望13元。認為旺旺收入已復蘇，管理層亦願意花錢優化業務，在增加自動化及銷售成本穩定下，利潤率有望再提升。
睇埋旺旺走勢圖，昨日Ｖ形反彈，雖曾跌穿11元，但之後收復失地，收報11.50元。強勢未減，繼續睇升！
瑪姬兒