參加科威特總領事在香格里拉酒店舉行之國慶聚會，聽李澤培代表國際商會中國香港區分會對特區政府之公司法例修訂表示強烈不滿，堅決要求維持現行公司查冊制度之後，深感傳媒對此修訂案完全走漏眼，香港記者協會依家就嘈，但去年六月之時，記協對此事好似懵然不知，矇查查就讓立法會通過，深感遺憾，依家可謂恨錯難返，仍然反對，只係盡吓人事而已。
離開香格里拉，匆匆步行去香港會參加馨香宴，此宴最初本是公關大姐大辦春茗，十年之後，已演變成為編輯與專欄作家之團拜大會，好似林超人話齋：「公關春茗我未必去㗎，不過有好多人成年未見過，要來此碰頭話舊，傾到唔捨得走。」咁又係，大家傾偈多過吃飯，享受談話多過欣賞美食，雖則個個食完半邊龍蝦與燒牛肉之後，都猛話美味，香港會啲食物係有水準嘅，全部係靚嘢。
傾呀傾呀，十時過後，眾人方始盡歡而散，每人在𨋢口獲贈一袋新年禮物，袋就是一個LeSportsac小型旅行衣服袋，內裏裝住台灣上等一級腐乳或蜜糖，半島酒店松露朱古力一大盒，Cookie Galerie特製曲奇（黃師弟為是晚嘉賓特別炮製曲奇餅）、新竹米粉，按摩球，案上月曆等等。大主筆話趕住返工，將抽中嘅獎品Panasonic自動麵包機轉送俾大記者，大記者已經「被退休」好耐，日日唔駛返工，可以在家整麵包，一於卻之不恭，連聲多謝之餘，雙手捧過，點知即刻嘩的一聲，幾乎將麵包機跌落地。左丁山話周街都有麵包賣，做乜咁麻煩自己在廚房自製麵包？一念素食嘅伍成邦話：「唔係呀，麵包機全自動化，我晚上將我自己鍾意嘅有機穀類放入去，第二朝就有麵包食，完全合晒自己心水，夠晒健康，食得好放心！」哦，不講不知，佢地呢班環保/有機/素食派，好講究自製健康有機麵包，有咗呢部神奇自動麵包機之後，個個都話不可或無！是晚左丁山冇運，乜獎品都抽唔到，與港龍與國泰送出嘅商務機票更加無緣，唯有幫大記者抬獎品LeSportsac及麵包機落樓，在香港會門口等的士，好彩有一架駛至，忽見梁錦松與愛妻伏明霞站在身後，松哥伸手快快要幫左丁山拎袋上的士㖭，連忙叫一聲：「松哥，請回，請回！」