兩會正在北京舉行，溫總嘅工作報告固然重要，部份委員嘅言論亦非常高水準。身為全國政協委員嘅汪阿姐，開會期間直指特區政府應盡快就2017年普選特首進行諮詢，又狠批佢哋處理國民教育事件太硬，完全講出香港人嘅心聲。還記得舊年阿姐高呼明星政協唔係花瓶，所言非虛，狼英唔該學嘢。
鄰居晉佳提到，市況回復平靜後，有力再起動嘅股份值得望多兩眼，唐牛即刻睇番手上嘅shopping list，發覺老牌工業股震雄集團（057）最堪憧憬。本欄不只一次推介，皆因前景佳、估值平兼走勢靚。內地經濟復蘇勢頭良好，PMI連續五個月處於擴張水平，對主打注塑機業務嘅震雄絕對利好，集團豪擲3億銀擴建深圳基地，產能有望提升三成。震雄現價PB 0.6倍，較同業海天國際（1882）嘅2.8倍，大幅折讓近八成，邊隻抵買一目了然。震雄昨升1.2%至2.65元，較大市更快創今年新高，動力十足，中線坐三望四。
唐牛