中環富豪常常玩失蹤，去咗邊？原來去萬邦行富豪神秘髮廊「大麗雅」飛個靚髮。客仔包括「四叔」李兆基、鄭裕彤、政界中人董建華、梁愛詩、范徐麗泰，採訪這天「公職王」陳智思也來幫襯。記者問老闆陳大衞，誰來得最密？「舊時就彤叔，四叔都多。」誰給小費最疏爽？「梗係最有錢嗰個啦，哈哈!」
圖、文：中環特工隊
《四大魔髮師》
髮廊當家 陳大衞
大麗雅最出名是一店子放滿色情刊物，陳大衞解釋：「（客人）呢度睇方便啲，屋企有仔女、老婆，老婆會鬧你：『癡線，買呢啲嘢返嚟做乜鬼？』帶返寫字樓，同事又會搶嚟睇。喺呢度可以理直氣壯咁睇」。四叔、彤叔看嗎？「佢兩個好少」。
萬一搞到客人「揭竿起義」怎辦？「啲客幾十歲，後生仔都唔會啦，陳智思都唔會啦！」陳智思看過性書嗎？「咁我未見過佢睇，佢咁忙，睇呀？」陳老闆又買過裸男雜誌供女賓享用，怎料對方大罵：「發神經，你畀咁嘅嘢我睇做乜鬼嘢？」陳大衞趕忙換上八卦、時尚雜誌。那本裸男雜誌呢？「掉咗啦，而家睇八卦雜誌，壹週、東周、明周。」
1963年印尼華僑John Tan在希爾頓酒店（現長江中心）開設首家大麗雅，風光一時，後來恤髮熱潮退卻，多家分店結業，只剩下由陳大衞當老闆的萬邦行店單打獨鬥，但客人也隨着歲月流失，「有啲幫趁好多年，有啲後生幫趁到老，有啲死咗，有啲嚟唔到，例如坐輪椅，所以人客愈嚟愈少。」
還好，當中環租金如火箭攀升，大麗雅只在三年前加過10幾％租金，無他，萬邦行老闆鍾明輝也是這裡常客。
富豪御用 阿譚
多年來李兆基、鄭裕彤、陳智思都點名找譚師傅理髮，這天「公職王」一入來便拋下一句：「我得十分鐘！」記者以為所有富豪都趕時間，阿譚解釋：「唔係，佢有時間畀你，講明幾點嚟到，千祈唔好要佢等，唔好要佢遲走，又唔好要佢早走」。早走都唔得？「梗係唔得，架車啱啱喺下面嘛」。
富豪理髮師是怎樣煉成的？「佢開心你就同佢開心，佢唔開心你就唔好出聲囉」。記者慨嘆有錢人真難服侍，「有錢冇錢都係，入得嚟我哋就要咁樣做嘢，有啲鍾意遲，有啲鍾意早，我又唔鬧得佢，又唔出得聲，總之要笑口噬噬，佢遲到你都要笑口噬噬。」有錢人總會多給小費吧？「唔一定，有啲人要充大濶佬嘛！」
中環Santino Albert Lee
Albert一生為女賓設計髮型，5、60年代在般咸道開設理髮店，謝賢經常駕駛跑車送嘉玲來幫襯。1968年Albert加入大麗雅，打後幾十年中華巴士創辦人顏成坤女兒顏潔齡等富人都幫襯他。
客人常向他透露私隱，「呢度啲富豪好多玩換妻，你個wife同我個wife調換，玩到咁寸都有！好嗰時卿卿我我，衰嗰時你唱我我唱你」。那刻Albert附和不是，駁斥也不是，「我話你唔好諗啲壞嘢，你應該回憶一下你歡樂嗰一刻，我唯有咁安慰佢」。
偶爾有夫妻吵架，丈夫聲稱到大麗雅理髮，妻子懷疑衰佬作反，打電話來求證。萬一那丈夫不在，Albert替他圓謊嗎？「唔多唔少都有，話啱啱線走咗囉！」
懲教打手 鄧偉
鄧偉有個理髮師爸爸，因此他自小會剪髮，廿來歲時卻投身懲教署，駐守喜靈洲監獄，變相陪犯坐監，「你以為啦，同犯一齊好happy㗎，久唔久佢同你揼下骨，朝早叫佢去廚房攞啲好嘢嚟食吓」。
那年頭獄警惡晒，鄧偉向記者講解打犯節奏「4拍4」，雙踭雙膝是為4拍。他又憶述「跛豪」吳錫豪在獄中練書法及氣功，甚至教他先天太極拳。18年前鄧偉毅然提早退休，重拾剪刀。「懲教有啲嘢好難做，識人好過識字，識人升快啲，識字無用。喺呢度（大麗雅）識剪髮就得，呢度個世界簡單啲」。
面對老謀深算的商賈，不是很複雜嗎？「平常心點會複雜？佢係人，你係人，我係人，大家平等，佢銀紙多過你，但帶唔走」。鄧師傅前半生服務男犯，下半生服務男賓，一生都服侍男人，「係呀，你想唔想我服侍你吖？」
中環爆料熱線：（whatsapp）94993777
