官非纏身嘅陳振聰前日放下風水羅庚，喺林以諾牧師、陳志雲、黃浩同徐淑敏見證下，正式受浸成為基督徒，以後唔叫Tony叫Peter。Peter噚日接受商業電台訪問，話浸禮原定4月復活節舉行，但為免外界騷擾，教會同林以諾喺前日幫佢喺青衣阡陌浸信會，安排一個只屬佢嘅秘密浸禮。
陳志雲捧場唱聖詩
浸禮嘅地點、時間只有獲邀人士先知，入場仲要對名；出席者約70人，包括陳振聰太太譚妙清同佢細仔。浸禮約近一小時，由林以諾牧師主持；同樣官司纏身嘅陳志雲到場唱詩，是非多多嘅黃浩亦有同藝人老婆徐淑敏到場見證。
唔講唔知，原來黃浩同Peter係十幾年老友，黃浩喺商台錄音訪問時仲話，Peter信主後冇咁執着，仲不時勸佢返教會；聽完黃浩感言嘅Peter，笑笑口話黃浩係自己隻「羊仔」，𠵱家落足嘴頭勸佢信主。Peter仲話，受浸係一生人最開心嘅事，仲開心過結婚㖭！美中不足嘅係浸禮提前舉行，正喺外國讀書嘅大仔訂唔到機票趕返嚟，好彩有老婆充當攝影師，即場傳相WhatsApp畀大仔分享喜悅。
Peter未信主前，為咗奪得千億遺產，大爆同龔如心嘅婚外情；譚妙清喺節目中被問到呢單嘢時冇直接回應，只話自己一心為小朋友着想，設法保住頭家，覺得老公信主後顧家咗，份人冇咁竧。
mailto:[email protected]
