港產女畫家Jeanie梁媛媛的故事,其實幾夢幻。兩年間連出三冊繪本大受歡迎,舉辦了兩次大型畫展,甚至進軍亞洲市場。她形容,這兩年,總有做夢的感覺。「從來,我只敢行公認嘅路:中學揀理科、大學讀BBA,畢業後做銀行。做藝術家?唔敢諗,好遙遠」。三年多前才正式學畫,卻一鳴驚人,誤打誤撞找回夢幻似的人生下半場,小妮子有話要說。記者:呂麗嬋
「我今年32歲,28歲先正式學畫,但竟然做咗畫家,人生真係好有趣。做畫家係我嘅夢想,但想還想,讀藝術、做畫家?好唔實在。大學選科,好多人話讀BBA出路好,就揀BBA,乜嘢先係自己興趣?唔知,總之唔抗拒、人哋話好,就係我嘅選擇。
2003年科大BBA畢業,順理成章喺銀行做嘢,一做六年,負責寫發展計劃書,生活平靜安穩,但日日返工放工,卻冇開心感覺。我一直以為,工作嘛,本應如此,冇嘢好怨。直至三年前,偶然機會下,參加咗個短期藝術課程,我嘅人生下半場,原來先真正開始。
課程要畫畫,畫到半夜3點,唔想停。對住畫板我先知,原來做自己鍾意做嘅嘢,就係呢種感覺!嗰時我結婚冇幾耐,老公見到我咁開心,竟然同我講:『你講過夢想做畫家,我覺得你畫得好好,點解唔試吓?』好震撼,亦好感動。我問自己,做畫家?我可以嗎?
由細到大,我都係一個好怕變嘅人,好多顧慮。我老公永遠係我嘅催化劑,初相識時,佢送過一個小玻璃樽畀我,入面有張字條:『唯一阻止你實現夢想嘅人,就係你自己。』呢句話,我一直記住。2010年,我真係辭咗份工,喺屋企全職畫畫。嗰時,冇知名度、冇完整作品、冇出版社洽談,冇背景冇資金冇名師提攜……28歲,重新起步。
大部份朋友都以為我只係搵個藉口休息吓,但我知道,我真係想變。日日朝早8點起身畫畫。半年,累積咗近30幅作品,我寫低每幅畫嘅創作意念,逐間出版社自薦。看似渺茫,但竟然有一間專門出版藝術書嘅本地出版社欣賞,同年,我就以未滿一年畫齡,出版咗我第一部繪本作品《A Time for the Heart》(心願),一個關於尋找真正快樂嘅故事。
無悔走過冤枉路
夢想,原來冇想像咁遙遠!之後嗰兩年,好似發緊場美夢。作品竟然引起好多人共鳴,可能好多人都好似我咁,營營役役,缺乏走出第一步嘅勇氣吧?但我冇後悔走過冤枉路,呢啲都係我生命嘅一部份。最近,我喺世貿中心舉行個人展覽,以『回憶森林』為主題。
好多時,我哋只想留住生命中嘅金蘋果,錯過咗唔起眼、甚至苦澀嘅蘋果葉。但冇葉子映襯,再美好嘅金蘋果,都會失色。讀BBA、六年嘅銀行工作,係我生命歷程嘅一部份。人生好長,無論係甜係酸,記住,就好。」